د افغانستان د ملي سرود شاعر ښاغلي عبدالباري جهاني ؛ اولسمشر حامد کرزی، لوی او د لوړي حوصلې خاوند وباله.
د فیسبوک پر پاڼه دغه نظر د اولسمشر د هغي پرېکړې څخه د منني په وړاندي کولو خپور سوی دی چي له مخي یې د ښاغلي جهاني په شمول، د هیواد شلو تنو مخورو لیکوالانو ته د قدر مډالونه اعطا سويدي.
ښاغلي جهاني د اولسمشر کرزي پر کارونو د تېرو پینځو کلونو په اوږدو کي د خپلو نیوکو او په مقابل کي د نوموړي ددغه اقدام په هکله لیکي: ( تاسي ته به ښه معلومه وي چي د ۲۰۰۹ کال د جمهوری ریاست په انتخاباتو کي زه د جمهوریس کرزي په مقابل کي د ډاکټر صاحب اشرف غني شاته ودریدلم او له هغه وخته راهیسي مي په دې تیرو پنځو کالو کي د جمهوریس حامد کرزي د حکومت پر ضد په لسګونو مضامین لیکلي دي. خو جمهوریس حامد کرزي ماته د میرمسجدي خان د مډال په عطا کولو سره خپله لويي وښودله).
د ۲۰۰۹م کال په اولسمشریزو ټاکنو کي د نوماند ډاکټر اشرف غني احمدزي څخه د ښاغلي جهاني جدي ملاتړ، په داسي حال کي چي د اولسمشر کرزي او د هغه د کورنۍ سره د شاوخوا نیمي پېړۍ اشنايي ته یې د خپاګان ټکي ایښاوه، په رسنیو کي هم د پام وړ موضوع څرګنده سوه.
د ښاغلي جهاني دریځ له هغه وخته مخکي لا د حکومت پر نیمګړتیاوو د سمون ږغ پورته کول وو. خو دا چي اولسمشر کرزي تر کلونو نظریاتي مخالفت او نیوکو وروسته بیاهم جهاني د میرمسجدي خان په مډال ونازاوه ؛ ښاغلی جهاني په خپل نظر کي د منني په ډول وايي: ( ما نه په پخوا کي د هیڅ مشر او جمهوریس څخه دونه پراخه حوصله لیدلې وه او نه په آینده کي د هیڅ مشر څخه د دونه پراخي حوصلې تمه کولای سم. دا چي زه هغه د خپل ټول مخالفت سره بیا هم د شلو لیکوالانو په کتار کي د ویاړه ډک مډال په عطاکولو کي هیر کړی نه یم، دا یې خپله لویی ده. زه باید د یوه افغان په حیث دهغه د دې لویی حق اداکړم).
باید وویل سي چي د هیواد د جمهوري ریاست له خوا د وري ( حمل ) پر شلمه، د ښاغلي جهاني په شمول،د هیواد د بېلابیلو چارو شلو تنو مخکښو شخصیتونو ته عالي دولتي مډالونه اعطاسول.
