دخپریدو نیټه : 2014-10-01 مخپرونکئ : 128 - دبېنواخبریال - کابل
عبدالله عبدالله: د افغانستان خاوره به د هېچا پر ضد و نه کارول شي
احمدفیصل
د ملي یوالي د حکومت اجراييوي مشر وايي د افغانستان او امريکا او د افغانستان او ناټو ترمنځ امنيتي تړونونه تر کره کتنې وروسته په هېواد کې د امنيت او ثبات د ټينګښت په موخه لاسليک شول.
د افغانستان او امريکا او د افغانستان او ناټو ترمنځ امنيتي تړونونه پرون له غرمې وروسته د افغانستان د ملي امنيت د سلاکار محمد حنيف اتمر او په افغانستان کې د امريکا د سفير جيمز کننګهم او دويم سند هم، د اتمر او په افغانستان کې د ناټو د ملکي استازي موريټس يوخيم ترمنځ لاسليک شو.
د يادو تړونونو تر لاسليک کېدو وروسته، د افغانستان اجراييوي مشر ډاکټر عبدالله عبدالله وويل، چې افغانستان د يادو دواړو تړونونو د لاسليک کولو په برخه کې په شعوري توګه ګام پورته کړى دى.
دغه تړونونه د افغانستان د امنيت او ثبات د ټينګښت په موخه لاسليک شوي دي.
هغه زياته کړه:« دا يو بنسټيز ګام و، چې موږ پورته کړ او د دې تړون پلي کېدل، موږ سره مرسته کوي، ترڅو په راتلونکي کې پر خپلو پښو ودرېږو او خپل امنيت په خپله ټينګ کړو.»
نوموړي هيله وښوده، چې د دې تړونونو په پلي کېدو سره به په راتلونکي کې زموږ ځواکونه وکولاى شي په يوازې ځان د هېواد امنيت ټينګ کړي.
اجراييوي مشر وايي: « موږ ټولو دغه تړونونه په دقت سره مطالعه کړي او مواد يې د افغانستان په ګټه بولو.»
د عبدالله په وينا، د دې تړونونو په لاسليک کې ځکه ځنډ رامنځ ته شو، ترڅو په کره توګه مطالعه شي او د افغانستان ګټې په سمه توګه په کې خوندي شي.
دى زياتوي: « په افغانستان کې سوله او ثبات د سيمې او ګاونډيو هېوادونو د سولې او ثبات په معنا ده او زه غواړم ووايم، چې د دې تړونونو د لاسليک کېدو له امله به د هېڅ هېواد امنيت او ثبات ته تاوان ونه رسېږي.»
عبدالله د سيمې هېوادونو ته ډاډ ورکړ، چې هېڅ مهال به د افغانستان له خاورې څخه د هغوى پر ضد ګټه نه پورته کېږي .
اجراييوي مشر په امنيتي او نورو برخو کې د نړيوالې ټولنې له مرستو مننه وکړه.