طالبانو محمدحسن اخند له کاره ګوښه کړی

راپورونه وايي د طالبانو ترمنځ د خپل منځي اختلاف له کبله د د طالبانو د حکومت د سرپرستې شورا پخوانی مرستيال او د باندنیو چارو وزير ملا محمدحسن اخند له کاره ګوښه شوی او یوه ځانګړي کمېسیون ته د پوښتنو ګروېږنو لپاره سپارل شوی دی. تاند وېپاڼه د باوري سرچینو له قوله وايي چې ملا محمد حسن اخند غوښتل په افغان چارواکو کې د نفوذ له لارې هغوی طالبانو ته تسلیم کړي، خو افغان حکومت پر هغه نفوذ کړی او سولې ته یې لېوال کړی و. سرچینې ویلي چې د پاکستان حکومت طالبانو ته د نوموړي داسې تلفوني اړیکې سپارلې چې دی له افغان چارواکو سره د سولې په اړه خبرې کوي. له حقيقاتو وروسته ملا محمدحسن اخند په سملاسي توګه د رهبري شورا له عضويت او د جلب او جذب د کميسون له رياسته لرې شوی او د مالي اختلاس د نورو تورونو د څيړلو لپاره ځانګړي ټاکل شوي کميسون ته ور معرفي شوی.