د یوناما، د ملګرو ملتونو د کډوالو د ادارې او افغانستان د بشر د حقوقو د کمیسیون د پام وړ !
نن نهمه ورځ ده چې تخار میشته جنګي جنایتکارانو سلګونه کسان چې دیری یې ښځي او ماشومان جوړوي په خپل محاصره کې ساتلي دي. د راپورونو له مخې محاصره شوي کسانو خپله خوراکي زیرمه ختمه کړې ده او دوی ته د خوراکي موادو راوړونکو چې د سیمې عام خلک دي، نه پریښودل کیږي. لسګونه ماشومان د نس ناستې په رنځ اخته شوي او مرګ یې ګواښي.
دغه کورنۍ هغه مهال د سیمه ایزو جنګسالارانو لخوا محاصره او برمته شوې، چې له اوږده مهاجرته ورسته، په افغانستان کې د سولې او ډیموکراسۍ په تامینیدو خپل وطن ته، د آرامه ژوند، په سوله او بیا رغونه کې د وڼدې په موخه ستنې شوې دي.
د نهمې ورځې د رارسیدو سره سره، د افغانستان دولت، په افغانستان کې د ملګرو ملتونو د ایجنسي یانو، د بشري حقوقو د کمیسیون او میشته نړیوالو دوستانو غوږونه کاڼه نیولي او خپل ماموریت یې، چې په افغانستان کې د سولې او تیکاو تامینول، د بشري حقوقو یقینې کول، او د افغانستان ولس ته د سوکاله ژوند برابرول دي، هیر کړی دی.
د یادو شوو بنسټونو بې پروایي د عامه خلکو په ذهنونو کې د هغوي د بې پرې توب په اړه ډیر شکونه را ولاړ کړي دي. که له یوې خوا د ړندو بمباریو بهیر، د ځینې خاصو کړیو په اشاره لسګونه بې ګناه ښځې او ماشومان د القاعده او طالبانو په نوم وژنې او له بله پلوه بیا نورې ډلې د دولت د کنترول په ساحه کې د شخصي زندانونو تر چتر لاندې سلګونه بې ګناه او بې وسه کسان برمته کوي، نو د ټولو بنسټونو خولې بندې وي، او که بیا د افغانستان د میشتو وګړو تر مینځ کومه حقوقي شخړه را ولاړیږي، په قومي او سیاسي زهرو یې ککړوي.
د هرات دعلماو د شورا رییس وینا ده چې د شینډنډ پر عزیز آباد د بمونو باران د همدغو کړیو د غلطو او مغرضو مشورو او لمسون له مخې شوی دی، چې باید عاملین یې په نښه او د قانون منګلو ته وسپارل شي.
په تخار کې د همدغو جنګي ډلو واک دومره بره دی، چې د دولت لخوا لیږل شوې ډله هم د هغو پر وړاندې د کومې پریکړې صلاحیت جراات نلري. ښه مو په یاد دې د ۲۰۰۵ کال په اپریل کې همدغو ډلو په تخار کې د انتخاباتو ولایتي دفتر چې هغه مهال یې د نانسي په نوم بهرنۍ میرمن مشره وه، ګواښل شوې وه او ورته ویل شوي وو چې د کارکونکو ټاکنې به د دوی په خوښه کوي. په تخار کې د دغو دفتر کارکونکي او هغه مهال په تخار کې د یوناما استازی سایمون د پیښې شاهدان دي.
موږ پدې باور یو، که د دغو جنګسالارانو واک کم، او کنترول پرې حاکم نشي، ډیرې داسې نورې ستونزې به هم راولاړې کړي چې بیا به یې دولت د کنترول وس هم ونلري او د نړیوالو میشتو قوتونو حیثیت ته به درنه صدمه ورسوي.
په افغانستان کې میشت ټول قومونه سره وروڼه دي، او د یو بل په غم او ښادې کې ځان شریک بولي، بس څو مغرضه کسان دي چې که ښه ورته ځیر شو د خاصو کړیو په اشاره، داسې کارونه کوي چې د چا خبره خپل پښه په خپلې تښځې پریکوي.
موږ له ملګرو ملتونو، میشت نړیوالو قوتونو او بشر د حقوقو له کمیسیون څخه غوښته کوو چې د دغو بیوزلو کسانو مرستو ته ودانګې. له یوې خوا به دوی خپل دنده پرځای کړې وي او له بله پلوه به د عوامو له ذهنونو را پورته کیدونکي شکونه لیرې کړي.
مزار شریف
