- پلانی . . . پاته سوی دﺉ

بل ناوړه ترکيب، چي له هندي او اُردو ژبو څخه پښتو ته لاره پیدا کړې ده، د « پاته سوی دﺉ » عبارت دﺉ، چي د هندي ژبي د « رهنا » له مصدر څخه اخيستل سوی دﺉ؛ مثلاً په اردو کي وايي : « فلان آدمی چهـ سال پارليمينٹ / اسميبلےکا مِمبر رهچکاهے . » د کوزي پښتونخوا وګړي همدا جومله داسي پښتو کوي : « پلانی شپږ کاله د پارليمينٹ / اسيمبلې مِمبر پاته شوی دﺉ . » د دې خوا ځيني پښتانه هم په ناپوهۍ سره دا جومله داسي وايي : « پلانۍ شپږ کاله د پارلمان غړی پاته سوی دﺉ . » د « پاته سوي » ترکيب په پښتو کي سم او خونده ور نه برېښي . هغه پښتانه، چي ژبه يې د پردو له ناوړي اغېزې په امان وي، دا جومله داسي وایي : « پلانی شپږ کاله د پارلمان یا شورا غړی ؤ . »، « پلانی لس کاله په پوهنتون کي استاد ؤ . » يا « پلانی څو کاله د کابينې وزير ؤ . » د پښتو خوند، اساني او هونر په دې کي دﺉ، چي ډېري لويي پرپړې په يوه ټکي کي بيانوي . دلته هم ګورو، چي په مخکنييو درو پښتو جوملو کي د « ؤ » ټکی په يوازي سر د هندي او اردو ژبو د درو ټکو ( پاته سوی دﺉ )جواب وايي .
که څوک په ژبه کي، د يوه معقول او منطقي دليل له مخي يو نيم پردي ټکي کاروي، دا څه لوی عيب او نه بخښوونکې ګونا نه ده؛ مثلاً که د کوزي خوا پښتانه د « ولسي جرګې » پر ځای د « قومي اسېمبلې »، د « مشرانو جرګې » پر ځای د« سينيټ »، د « غړي » پر ځاي د « مِمبر » ټکي استعمالوي، دا ډېره د اندېښنې وړ خبره نه ده ( که څه هم بايد تر وسه وسه کوښښ وسي، چي تر اشد ضرورت ها خواپه پښتو کي د پردو ټکو جدي مخه ونيوله سي )؛ ځکه ټولي ژبي د ټولنيز ژوند د اړتياوو له امله، په يوه ډول د ډولونو د نورو ژبو کليمې، ترکيبونه او اصطلاحات اخلي . ځيني ټکي او ترکيبونه د يوه هيواد دملي ټرمينالوژي يوه برخه وي، چي د هغه هيواد په جغرافيايي حدودو کي يې د هري ژبي ويوونکي بايد په خوښۍ سره ومني . تر دې استثنأ چي تېر سو که يو پردی ترکيب، په خپله اصلي يا ژباړل سوې بڼه، زموږ په ژبه کي د سليم ذوق، اسانۍ او سادګۍ د اصولو پر خلاف وي، نو هلته بايد د داسي ناوړه ترکيبونو جدي مخه ونيوله سي، چي پر پردي توب سربېره زموږ د ژبي اصــــــــــــيل جوړښت ورانوي .