د ولسمشرۍ کانديدانو د ملي وحدت حکومت د رامنځته کېدو په خبرو کې له مهمو پرمختګونو څخه خبر ورکړ .
دغه څرګندونې د ولسمشر ماڼۍ له مطبوعاتي دفتر څخه په خپرې شوې خبرپاڼه کې شوې دي.
د سرچینې په وینا ، د ولسمشرۍ کانديدانو ډاکتر اشرف غني احمدزي اوعبدالله عبدالله سره د جهادي رهبرانو او د دولت د درې ګونو قواوو د مشرانو غونډه، د ولسمشرکرزي او د ده مرستيالانو په حضورکې نن له غرمې مخکې د دلګشا په ماڼۍ کې جوړه شوه.
د غونډې برخه والو په يادو مواردوکې د مهمو پرمختګونو له امله خوښي څرګنده او د ولسمشرۍ له کانديدانو يې وغوښتل چې ډير ژر نهايي نتيجې ته و رسيږي او له موضوع څخه د افغانستان خلک خبر کړي. ولسمشر کرزي له يادو پرمختګونو څخه خوښي څرګنده او هيله يې وکړه ، چې زموږ د هېواد د مشرانو په حضورکې د دغو موافقو متن ډير ژر تسجيل شي. د دغې غونډې په پای کې د تحليف د مراسمو د څرنګوالي په اړه هم خبرې وشوې .