ولسمشر اشرف غني کاندید وزیران ولسي جرګې ته د باور رایې لپاره ور معرفي کړل. نوموړي په ولسي جرګه کې د خبرو پرمهال وویل چې تر دې وروسته پر معرفي شویو کسانو باور د ولسي جرګې کار دی. ولسمشر غني وویل هڅه یې کړې چې داسې کسان د کاندید وزیرانو په توګه معرفي کړي چې له ولسي جرګې د باور رایه ترلاسه کړلی شي. ده دغه راز له ولسي جرګې مننه وکړه چې د کاندید وزیرانو په معرفي کې له ځنډ سره سره یې حوصله وکړه. د ولسمشر له لوري په معرفي شویو کسانو کې کرنې وزارت ته د نوماند محمد یعقوب حیدري نوم نه و او د برېښنا وزارت لپاره د محمود صیقل پر ځای عبدالرحمن صالحي معرفي شو.