په افغانستان کې د ناټو ځواکونو مرستيال قوماندان وايي چې افغان ځواکونه اوس مسلکي شوي او کولى شي له دغه جګړه ييز موسمه هم په برياليتوب ووځي. ډګر جنرال کرسټين جيکوپسن ویلي چې افغان ملي دفاعي ځواکونه په روان جګړه ييز موسم کې ښه جګړه کوي. نوموړي ويلي چې افغان ملي ځواکونو په تېرو څو مياشتو کې بريالي عمليات ترسره کړي او د لومړي ځل لپاره هغو سيمو ته ولاړل چې پخوا نه وو تللي. ډګر جنرال جيکوبسن په هلمند کې د ذوالفقار په نوم ترسره شوو عملياتو ته په اشارې سره وويل چې دا بشپړ د افغانانو له خوا پلان او ترسره شوي بريالي عمليات وو.