د اروزګان ولايت د خاص اروزګان ولسوالۍ په سلطان محمد ناوه کې هغه اتيا تنه سيمه ايز پوليس د مرګ پر پوله دي چې د څو ورځو را په دي خوا پري درنه جګړه پيل سوي ده.
د اروزګان ولايت د سرپرست والي وياند دوست محمد ناياب وايې ، چې په سلطان محمد ناوه کي د ملا عبدالصمد د سيمه ايزو پوليسو قومندان او د هغه سرتېري شاوخوا اتيا تنه سيمه ايزو پوليس په يوه کلا کې تر کلکي محاصري لاندي دي او که چېري نن د ورځي تر پايه هوايې ځواکونه ور نسي نو دا سرتېري به يا خو وسله والو طالبانو ته تسليم او يا خو ووژل سي.
سلطان محمد ناوه د دې ولسوالۍ نيمه برخه تشکيلوي او د تيرو څلورو ورځو پر مهال سلګونه وسله وال د زابل او غزني ولايتونو څخه ورغلي دي .
د ناياب د مالوماتو پر اساس چې د ځمکي له لاري دغه سرتېرو ته رسيدګي نسي کيداى ځکه چې شاوخوا ٣٥ کيلومتره د خاص اروزګان ولسوالۍ د مرکز څخه ليري دي او همدا ډول په لاره کې د وسله والو مخالفينو شتون هم هغوى ته د اکمالاتو د کولو مخه نيولي ده.
ناياب د مرکزي حکومت او په کندهار کې د ٢٠٥ اتل قول اردو او نورو ځواکونو څخه وغوښتل چې ژر تر ژره اقدام وکړي .
نوموړي دا هم وويل چې په سيمه کي تر دې مهاله څلور تنه پوليس وژل سوي او شپږ تنه نور يې ټپيان سوي دي.
ناياب په دي درنه جګړه کې د ګڼ شمېر وسله والو مخالفينو د مرګ ژوبلي خبره وکړه او وايې چې لا هم درنه جګړه روانه ده.
تر اوسه د دولت وسله والو مخالفينو په دي اړوند رسنيو ته څه نه دي ويلي.