ولسمشر اشرف غني د غالیو اوبدونکو له ټولنې له دې کبله مننه کړې چې د هېواد په کچه یې ۱،۶ میلیونه کسانو ته د کار زمینه برابره کړې ده. د ولسمشرۍ مطبوعاتي دفتر وايي ولسمشر د غالۍ اوبدونکو د ټولنې له استازو سره په کتنه کې ویلي چې دی به د ترکمنستان له ولسمشر سره چې په نږدې راتلونکي کې کابل ته راځي پر دې هم خبرې وکړي چې دغه هېواد له افغان غالۍ اوبدونکو سره څه مرسته کولی شي. ولسمشر سوداګرۍ وزارت ته دنده سپارلې چې په راتلونکو دوو اونیو کې د غالیو د تولید په برخه کې د ستونزو د حل لپاره خپل مشخص وړاندیزونه برابر کړي. ولسمشر غني ژمنه وکړه، چې د افغانستان حکومت د غالیو د صنعت د بنسټیزو ستونزو د حل لپاره هلې ځلې کوي.