په کابل کې د هند سفیر وايي هېواد یې له افغانانو سره په خپلو پښو د درېدو په موخه همکاریو ته دوام ورکوي. منپرېت وهرا دغه څرګندونې په کابل کې د ملي امنیت له سلاکار حنیف اتمر سره د سلما بند د پرانستې په اړه د لیدنې پر مهال کړې دي. د ملی امنیت شورا له مطبوعاتي دفتره په خپره شوې خبرپاڼه کې راغلي، چې په دې لیدنه کې د سلما بند پروژې د پرانستې مراسمو ته پر چمتووالي خبرې وشوې. سرچینه زیاتوي، چې حنیف اتمر له دوست هېواد هند څخه مننه وکړه، چې له افغانستان سره یې په سترو ودانیزو او ټولګټو پروژو کې همکارۍ کړې دي. خبرپاڼه کاږي، د هند سفیر هم ډاډ ورکړ، چې هېواد یې له افغانانو سره په خپلو پښو د درېدو په موخه دوامدارو همکاریو ته ژمن دی.