داعش ډله په افغانستان کې لا هم پیاوړې ده

ویل کیږي، داعش ډله په افغانستان کې نه ده ځپل شوې بلکې داسې هڅې کیږي، چې یاده ډله په کوچنیو ډلو وویشل شي او بیا د یوه واحد هدف لپاره، خو په جلا جلا هویتونو د جګړې ډګر ته راووځي. د افغانستان په ختیځ کې وخت ناوخته پر هغو سیمو هوایي بمبارۍ کیږي چې داعش ډلې پکې سر راپورته کړی و، خو د هغوی د جنګیالیو مړي نه د سیمې خلکو په سترګو لیدلي او نه هم رسنیو ته ښودل شوي دي. شنونکي وایي، داعش ډلې د بدنامۍ او زور له لارې په افغانستان کې هغه رول او ځای ونه موند، چې ددې پروژې عملي کوونکو قوتونو ورته ټاکلی و، خو اوس په یوه ستراتیژیک سکوت کې د نویو جنګیالیو په جلب و جذب سره په وړو هویتونو د بیا ځل لپاره د سر راپورته کولو په حال کې دي. ویل کیږي د داعش جنګیالي اوس تر ډیره د کونړ په غرونو او تیرا کې دیره شوي او د خلافت خراسان، حرکت اسلامي ازبکستان او مجاهدین ترکستان شرقي په نوم د نویو هویتونو په خپلولو سره د فعالیتونو د بیا پیل لپاره تیاری نیسي.